Қазақстан Республикасының азаматтығын алуға ниетті азаматтар үшін тестілеуге өтініш қабылдау 10 тамызда басталып, 20 тамызға дейін жалғасады. Өтінішті Ұлттық тестілеу орталығының app.testcenter.kz сайты немесе UTO мобильді қосымшасы арқылы беруге болады. Тестілеу 22 тамызда өтеді, деп хабарлайды «Dalamedia» ақпараттық порталы.

Тест үш бағыт бойынша ұйымдастырылады. Үміткерлер қазақ тілінен 30, Қазақстан Республикасы Конституциясының негіздерінен 40 және Қазақстан тарихынан 30 тапсырма орындайды.

Қазақ тілі бойынша тестілеу тек қазақ тілінде өтеді. Бұл бөлімнен кемінде 15 балл жинау қажет. Конституция негіздері мен Қазақстан тарихы бойынша тапсырмаларды қазақ немесе орыс тілінде орындауға болады. Конституция негіздерінен шекті балл – 20, ал Қазақстан тарихынан – 15 балл.

Тестілеудің жалпы нәтижесі 100 балмен бағаланады. Қазақстан азаматтығын алуға үміткер тестілеуден өту үшін кемінде 50 балл жинауы тиіс.

Тапсырмаларды орындауға 2 сағат 10 минут беріледі. Мүгедектігі бар азаматтарға қосымша 30 минут уақыт қарастырылған.

Тестілеуге қатысу ақысы – 14 693 теңге. Ал білімін алдын ала тексеріп, дайындық деңгейін бағалағысы келетіндер үшін 3 355 теңгеге байқау сынағын тапсыруға мүмкіндік бар.

Тестілеуге қатысты толық ақпарат Ұлттық тестілеу орталығының testcenter.kz сайтындағы «Азаматтық алуға үміткерлерге» бөлімінде жарияланған.