Қазақстанда талапкерлер үшін негізгі Ұлттық бірыңғай тестілеу басталды. Биылғы тестілеу 10 шілдеге дейін жалғасып, ел бойынша 45 тестілеу орталығында ұйымдастырылады, -деп хабарлайды «Dalamedia» ақпараттық порталы.

Ғылым және жоғары білім министрлігінің мәліметінше, тестілеудің алғашқы күні 926 талапкер сынақ тапсырып жатыр. Оның ішінде 359 талапкер Астанада емтиханға қатысуда.

Ұлттық тестілеу орталығының дерегіне сәйкес, биыл ҰБТ-ға қатысу үшін шамамен 240 мың талапкер өтініш берген. Тесті екі рет тапсыру мүмкіндігі қарастырылғандықтан, жалпы өтініш саны 446 мыңнан асып отыр.

Биыл да талапкерлер арасында ең көп таңдалған пәндер комбинациясы – «Математика-Физика». Бұл бағытты қатысушылардың 17,9 пайызы таңдаған. Одан кейін «Биология-Химия» – 14,5 пайыз, ал шығармашылық бағыттарға 12,4 пайыз талапкер өтініш берген.

Тестілеу форматы өткен жылдардағыдай сақталған. Талапкерлер үш міндетті пән мен екі бейіндік пән бойынша емтихан тапсырады. Барлығы 120 тапсырма ұсынылады, ең жоғары көрсеткіш – 140 балл.

Емтихан кезінде қатысушылар кіріктірілген калькуляторды, Менделеев кестесін және тұздардың ерігіштік кестесін пайдалана алады. Қағаз нұсқасын қолдануға да рұқсат берілген.

Шекті балл деңгейі өзгеріссіз қалды. Ұлттық жоғары оқу орындарына түсу үшін кемінде 65 балл, өзге университеттерге 50 балл жинау қажет. Ал «Педагогикалық ғылымдар» мен «Құқық» бағыттарына 75 баллдан төмен нәтиже қабылданбайды. «Денсаулық сақтау» мамандықтарына шекті көрсеткіш 70 балл болып бекітілген.

Тестілеу орталықтарында қауіпсіздік шаралары күшейтілген. Металл іздегіштер, бейнебақылау камералары және мобильді байланыс сигналын бұғаттайтын құрылғылар орнатылған.

Бейнежазбаларды тексеру 31 қазанға дейін жалғасады. Егер ереже бұзу деректері анықталса, талапкерлердің тест нәтижелері мен білім гранттары жарамсыз деп танылуы мүмкін.