Қазақстанда бірқатар резидентура түлектері мемлекеттік емтихан нәтижесіне қатысты шағым білдіріп, тест тапсырмаларын қайта қарауды талап етуде. Болашақ дәрігерлердің айтуынша, қазақ тіліндегі сұрақтар сапасыз аударылған, ал кейбір тапсырмалар олардың таңдаған мамандығына сәйкес келмеген. Бұл туралы «Dalamedia» ақпараттық порталы хабарлайды.

Резиденттер 10 жылға жуық білім алып, еңбек жолын бастау алдында тұрған кезде осындай мәселеге тап болғанын айтады. Олардың сөзінше, қазақ тіліндегі тест сұрақтары орыс тілінен тікелей аударылғандай әсер қалдырған. Сонымен қатар кей мамандықтарға арналған тапсырмалардың арасында басқа бағыттарға қатысты сұрақтар көп болған.

Түлектердің айтуынша, осы себептен Қазақстанның бірнеше өңіріндегі медицина университеттерін аяқтаған жүзден астам резидент диплом ала алмай қалуы мүмкін. Олар Алматы, Қарағанды, Түркістан, Семей және Батыс Қазақстандағы оқу орындарының өкілдері ретінде өз шағымдарын жеткізген.

Резиденттердің бірі Нұрсұлтан Тоқтасын қазақ тіліндегі сұрақтардың мағынасы дұрыс берілмегенін айтып, орыс тілінде тапсырғандардың нәтижесі жоғары болғанын мәлімдеді.

Ал Айгерім Еркінбекова онкология бағыты бойынша білім алғанын айтып, қорытынды емтиханда өз мамандығына қатысы жоқ сұрақтар кездескенін жеткізді. Оның сөзінше, кейбір тапсырмалардағы суреттер анық көрсетілмеген.

Түлектер сонымен қатар қателерін нақты біле алмай отырғанын айтты. Олардың мәліметінше, Ұлттық тестілеу орталығы нәтижелерді толық ашпаған, ал апелляция бойынша жауап күткен.

Ал Денсаулық сақтау министрлігі резидентура түлектерінің емтиханнан жаппай құлағаны туралы ақпарат шындыққа сәйкес келмейтінін мәлімдеді.

Ведомствоның дерегінше, қорытынды аттестаттаудың екінші кезеңіне 3684 резидент қатысып, оның 3540-ы немесе 96,5 пайызы емтиханнан сәтті өткен. Шекті балл жинай алмағандар саны 134 түлек болған. Орташа нәтиже 80,7 балды құраған.

Министрлік емтихан тапсырмалары бекітілген талаптарға сай әзірленіп, бірнеше кезеңдік сараптамадан өткенін атап өтті. Сондай-ақ мемлекеттік тілдегі тапсырмаларға қатысты өтініштер қаралып, сөзбе-сөз аударылған сұрақтар анықталмағанын айтты.

Ведомство мәліметінше, емтихан кезінде түлектерге апелляция беру мүмкіндігі ұсынылған. Барлық өтініштер қолданыстағы тәртіпке сәйкес қаралған.

Министрлік сынақтан өте алмаған түлектердің алаңдаушылығын түсінетінін жеткізді. Сонымен қатар талапқа сай нәтиже көрсете алмаған резиденттер алты айдан кейін қорытынды аттестаттауды қайта тапсыруға құқылы екенін хабарлады.