Қазақстанда әскери жоғары оқу орындарының үздік түлектеріне алғаш рет оқу бітірген сәттен бастап «аға лейтенант» әскери атағы табысталды, — деп хабарлайды «Dalamedia» ақпараттық порталы.

Салтанатты рәсімде сөз сөйлеген Мемлекет басшысы бұл бастаманы былтыр көтергенін еске салды. Оның айтуынша, әскери оқу орындарын үздік тәмамдаған жастарға қалыптасқан дәстүр бойынша «лейтенант» емес, бірден «аға лейтенант» шенін беру туралы тапсырма берілген.

Президент биылғы түлектердің осы жаңашылдықтың алғашқы иегерлері екенін атап өтті.

«Сіздер оқу орнын аяқтап, бірден “аға лейтенант” шенін алып отырған алғашқы түлектер боласыздар. Бұл – үлкен сенім мен зор жауапкершіліктің белгісі», – деді Қасым-Жомарт Тоқаев.

Мемлекет басшысы әскери қызметкердің беделі шенмен емес, ел алдындағы адал қызметімен бағаланатынын айтты. Осы орайда ол Қазақстанның тұңғыш Қорғаныс министрі Сағадат Нұрмағамбетовтің «атақты алғаннан оны арқалап жүру қиын» деген сөзін мысалға келтірді.

Президенттің айтуынша, бүгінгі жас офицерлерге көптеген жастар үлгі ретінде қарайды. Сондықтан олар әскери антқа адал болып, өздеріне жүктелген міндетті абыроймен атқаруы қажет.

Сонымен бірге Мемлекет басшысы офицерлерді тәрбиелеп өсірген ата-аналарға алғыс білдірді.

Іс-шара барысында Сағадат Нұрмағамбетов атындағы Құрлық әскерлері әскери институтының, Ұлттық қауіпсіздік комитеті академиясының, ҰҚК Шекара академиясының, Ішкі істер министрлігінің Б.Бейсенов атындағы Қарағанды академиясының, Ұлттық ұлан академиясының және М.Ғабдуллин атындағы Азаматтық қорғау академиясының үздік түлектеріне «аға лейтенант» әскери атағы табысталды.

Айта кетейік, бұған дейін Мемлекет басшысы Мемлекеттік Туды көтеру рәсіміне қатысқан болатын.