Алматы облысында мектеп бітіруші түлектердің мерекелік іс-шаралары биыл күшейтілген бақылауда өтеді, ,-деп хабарлайды «Dalamedia» ақпараттық порталы. Өңірлік коммуникациялар қызметінде өткен брифингте облыстық Білім басқармасының басшысы Қайрат Жұманов пен Полиция департаменті Әкімшілік полиция басқармасы бастығының орынбасары Еркебұлан Ахметов қауіпсіздік шаралары туралы мәлімдеді.

Биыл өңірде бітіру кештерін мейрамхана, кафе, коттедж, демалыс орындары мен табиғат аясында өткізуге рұқсат берілмейді. Сондай-ақ соңғы қоңыраудан кейін автокортеж ұйымдастыруға, таң қарсы алуға және қауіп төндіруі мүмкін өзге де бейресми шараларға тыйым салынған.

Құзырлы органдардың айтуынша, түлектер қатысатын іс-шаралар тек полиция қызметкерлерінің бақылауында болмайды. Жол қозғалысы бейнекамералар мен арнайы дрондар арқылы да қадағаланады.

– Автокортеж жасап, қарсы жолаққа шығу, қауіпті маневрлер жасау немесе көлік қозғалысы кезінде жасөспірімдердің терезе мен люктен шығуы – өте қауіпті әрекет. Мұндай жағдайлар ерекше бақылауда болады, – деді Еркебұлан Ахметов.

Полиция өкілдері кәмелетке толмағандарға қатысты заңсыз кештерге, коттедж жалдау фактілеріне, сондай-ақ алкоголь мен энергетикалық сусын сатуға да назар күшейтілетінін айтты.

Білім басқармасы мектептерде ата-аналардан ақша жинауға қатаң тыйым салынғанын ескертті. Бұл талап бітіру кешін ұйымдастыру, безендіру, сыйлық алу және өзге де шығындарға қатысты.

Облыста 25 мамыр күні барлық мектепте «Білімім – Отаныма!» атты бірыңғай сынып сағаты өтеді. Ал аттестат тапсыру рәсімі 17-18 маусым күндеріне жоспарланған.

Сонымен қатар өңірде профилактикалық рейдтер басталып кеткен. Соңғы аптада «Түнгі қаладағы балалар» жедел-профилактикалық шарасы аясында түнгі уақытта заңды өкілінсіз жүрген жасөспірімдер анықталған.

Полиция департаменті енгізілген шектеулердің басты мақсаты түлектерді жазалау емес, балалардың қауіпсіздігін сақтау және қайғылы жағдайлардың алдын алу екенін атап өтті.