«Academy Awards» жүлдесінің 98-марапаттау рәсімі өтіп, кино әлеміндегі ең үздік туындылар мен актерлер марапатталды, — деп хабарлайды «Dalamedia» ақпараттық порталы «The Hollywood Reporter» басылымына сілтеме жасап.

Биылғы кештің басты жүлдесі — «Үздік фильм» атағы «Бітпейтін шайқастар» («One Battle After Another») картинасына бұйырды. Фильм режиссері Пол Томас Андерсон «Үздік режиссер» және «Үздік бейімделген сценарий» аталымдарында жеңіске жетті.

«Үздік ер адам рөлі» жүлдесін Майкл Б. Джордан «Күнәһарлар» («Sinners») фильміндегі рөлі үшін алды. Ал «Үздік әйел рөлі» аталымында Джесси Бакли «Хамнет» («Hamnet») фильміндегі рөлі үшін жеңімпаз атанды.

Екінші пландағы үздік актер жүлдесін Шон Пенн «Бітпейтін шайқастар» («One Battle After Another») фильмі үшін иеленсе, «Үздік екінші пландағы әйел рөлі» марапаты Эми Мэдиганға «Қару-жарақ» («Weapons») картинасындағы ойыны үшін берілді.

Анимациялық фильмдер арасында «K-Pop: Жын аулаушылар» («KPop Demon Hunters») үздік деп танылды. Фильмдегі «Алтын» («Golden») композициясы «Үздік түпнұсқа ән» аталымын жеңіп, K-pop жанрындағы алғашқы «Оскар» иегері атанды.

Сонымен қатар «Франкенштейн» («Frankenstein») фильмі костюм, грим және көркемдік безендіру аталымдарында үш марапат иеленді. Халықаралық фильмдер арасында «Сентименталды құндылық» («Sentimental Value») жеңіске жетсе, деректі фильмдер санатында «Мистер Ноубади Путинге қарсы» («Mr. Nobody Against Putin») үздік деп танылды.

Биылғы марапаттау рәсімі «Долби театры» сахнасында өтіп, киноиндустрияның басты оқиғаларының біріне айналды.