Желіде қазақ тілінде еркін сөйлейтін кәріс жігіттің видеосы көпшіліктің ықыласына бөленді. Оңтүстік Кореяның Ансан қаласында тұратын Владислав Пактың қазақша таза сөйлеуі жұртты сүйсіндірді, -деп хабарлайды «Dalamedia» ақпараттық порталы.

33 жастағы Владислав Пак Қызылорда қаласында дүниеге келген. Орыс сыныбында білім алса да, бала күнінен қазақ достарымен араласып, тілді табиғи ортада меңгергенін айтады. Оның сөзінше, қазақ тіліндегі кейбір дыбыстарды алғашында достарынан қайта-қайта сұрап, жаттыққан.

Отбасында тек орысша сөйлескенімен, сыртқы ортада қазақ тілінің қажеттілігі оны бұл тілді үйренуге жетелеген. Қалада тұрғындардың басым бөлігі қазақша сөйлейтіндіктен, күнделікті өмірде еркін араласу үшін тілді білу маңызды болғанын жасырмайды.

20 жасында тарихи отанына аттанған Владислав бастапқыда кәріс тілін үйренуде қиындық көрген. Алайда кейін қазақ тілін білуі жаңа тілді меңгеруге айтарлықтай көмектескенін түсінген.

Қазір ол халықаралық сауда саласында кәсіппен айналысады. Соған қарамастан, қазақ тілін ерекше жылы қабылдайтынын айтады. Оның сөзінше, қазақша сөйлеген сайын балалық шағы мен достары есіне түседі.

Кореяда жүргенде қазақтармен кездессе, қазақша тілдесуге тырысатынын айтқан ол, көп жағдайда сырт келбетіне қарап адамдардың онымен орысша сөйлесетінін жеткізді. Ал қазақша жауап берсе, қарсы тарап ерекше қуанып, бауырындай қабылдайтынын атап өтті.

Қазір Владислав қазақ тілін ұмытпау үшін әлеуметтік желіде қазақша видеолар түсіріп жүр. Болашақта Қазақстанға оралу жоспары да бар. Осы мақсатта тілін жетілдіріп, қазақша контентті жиі тұтынатынын айтады.

Ол жастарға тіл үйренуден қорықпауға кеңес берді. “Қате болса да сөйлеуден қашпаңыздар. Көп сөйлеген сайын тіл тез дамиды”, – дейді ол.