Президент Қасым-Жомарт Тоқаев қазақ тілінің мәртебесіне қатысты пікір білдірді,-деп хабарлайды «Dalamedia» ақпараттық порталы.

Мемлекет басшысы қоғамда кейде қазақ тілінің жағдайына байланысты түрлі пікірлер айтылатынын атап өтті. Оның айтуынша, қазақ тілінің мәртебесі төмендеді деп алаңдауға негіз жоқ. Президент жаңа Конституция жобасында мемлекеттік тілдің мәртебесі нақты көрсетілгенін айтты.

«Осы орайда қазақ тілінің мәртебесі төмендеді деп байбалам салудың қажеті жоқ. Жаңа Конституция жобасында “Қазақстан Республикасының мемлекеттік тілі – қазақ тілі” деп нақты жазылған. Бұл ретте ана тіліміз тек көркем әдебиетте ғана емес, еліміздің қоғамдық-саяси өмірінің барлық саласында кеңінен қолданылады. Ең маңыздысы, жастар арасында қазақша сөйлеу сәнге айналды», – деді Қасым-Жомарт Тоқаев.

Мемлекет басшысының сөзінше, қазіргі жастар бірнеше тілді еркін меңгеріп, заман талабына тез бейімделе алады. Оның пікірінше, бұл үрдіс қазақ тілінің дамуына да оң әсерін тигізеді.