Мәжіліс депутаты Нұртай Сабильянов жаңа конституциялық реформалар аясында бірпалаталы Парламенттің тиімді жұмыс істейтінін айтты. Оның сөзінше, заң жобалары енді ұзақ және көп сатылы қаралымсыз, жылдам әрі сапалы қабылданады, -деп хабарлайды «Dalamedia» ақпараттық порталы, «Jibek Joly» телеарнасына сілтеме жасап.

«Қазіргі кезде Мәжіліс заң жобасын екі оқылымда қарап, оны Сенатқа жібереді. Сенат та екі оқылымда талқылап, түзетулер енгізсе, қайта қайтарады. Егер Мәжіліс өзгертулерді қабылдамаса, қос палаталы келісім комиссиясы құрылып, үрдіс айлар бойы созылады. Мысалы, заң жобасы маусымда қабылданса, ол тек қазан айында қайта келуі мүмкін. Ақпараттық технологиялар дәуірінде жылдамдық - басты талап. Біз халық пен өңірлердің мәселелеріне уақытында жауап беруіміз керек», - деді Нұртай Сабильянов.

Бірпалаталы Парламентте заңдар үш оқылымда қабылданады: бірінші оқылымда концепциясы қаралады, екіншіде толық талқыланады, ал үшіншісінде Конституция мен ұлттық заңдарға сәйкестігі тексеріледі. Бұл халыққа Парламент жұмысына бақылау жасауға да жеңілдік береді.

Сонымен қатар, депутат реформалардың басты мақсаты - азаматтардың әл-ауқатын арттыру екенін атап өтті. Жаңа Конституция жобасында мемлекеттік қызметтің негізгі принциптері нақты көрсетілген: суверенитет пен тәуелсіздікті қорғау, адам құқықтары мен бостандықтарын сақтау, заң үстемдігі мен құқық тәртібін қамтамасыз ету, халықтың өмір сапасын көтеру.

«Бұдан бөлек, адам капиталын, білім мен ғылымды, инновацияларды дамыту мемлекеттік қызметтің басты стратегиясына айналады. Оған сәйкес, білім мен ғылымға қаржы артып, жастарға жаңа мүмкіндіктер ашылады», - дейді депутат.