Премьер-министр Олжас Бектенов энергетика және коммуналдық салаларға цифрлық технологияларды енгізу жұмыстарын күшейтуді тапсырды. Үкімет отырысында Smart Turmys бірыңғай цифрлық платформасын іске қосу мәселесі қаралды, — деп хабарлайды «Dalamedia» ақпараттық порталы.

Үкімет басшысы энергетика және коммуналдық секторлардағы цифрлық құралдар барлық бизнес үдерістердің ашықтығын арттырып, олардың тиімді жұмыс істеуіне мүмкіндік беретінін атап өтті.

«Энергетика және коммуналдық секторлардағы цифрлық құралдар барлық бизнес-үдерістердің ашықтығын қамтамасыз етіп, тиімділігін арттырады. Өнеркәсіп және энергетика министрліктері Smart Turmys бірыңғай цифрлық платформасын енгізу жұмыстарын жеделдетсін», — деді Олжас Бектенов.

Сонымен қатар Үкімет 1 қыркүйекке дейін тұтынушылар санаттарына қарай коммуналдық ресурстарды есепке алу құралдары мен бағдарламалық қамтамасыз етуге арналған бірыңғай стандарттарды қабылдауды тапсырды.

Бұл талаптар коммуналдық қызметтерді есепке алу жүйесін жетілдіруге және саланы цифрландыру үдерісін жеделдетуге бағытталған.