Батыс Қазақстан облысында дәрігерлердің қателігі салдарынан қатерлі ісік дер кезінде анықталмады деп есептеген марқұмның отбасы сотқа жүгінді. Сот шешімімен №2 аурухана марқұмның жақындарына моральдық шығын үшін өтемақы төлеуге міндеттелді, — деп хабарлайды «Dalamedia» ақпараттық порталы.

Оқиға 2023 жылдың желтоқсанында басталған. Бәйтерек ауданының тұрғыны №2 аурухананың жалпы тәжірибе дәрігеріне қаралған. Ол жиі құсу және қара нәжіс сияқты шағымдар айтқан. Бұл белгілер асқазан-ішек жолдарындағы күрделі мәселелердің белгісі болуы мүмкін еді. Алайда науқасты емдеу шамамен тоғыз айға созылып, 2024 жылдың 15 тамызында ер адам қатерлі ісіктен қайтыс болған.

Марқұмның әйелі мен баласы ауруханаға қарсы сотқа талап арыз беріп, моральдық зиян үшін әрқайсысына 10 миллион теңгеден өтемақы өндіруді сұраған.

Сот барысында аурухана өкілдері мен емдеуші дәрігер өздеріне тағылған айыппен келіспеді. Олар науқасқа қажетті медициналық көмек толық көрсетілгенін, оған ФГДС, зертханалық талдаулар және скринингтен өту ұсынылғанын айтқан.

Дәрігердің сөзінше, жалпы қан талдауы қауіпті өзгерістерді көрсетпеген, ал ауру жасырын түрде дамыған. Медициналық қызметкерлер науқастың қайтыс болуына өз әрекеттерінің тікелей қатысы жоқ екенін алға тартқан.

Алайда сот медициналық құжаттар мен іс материалдарын зерттей келе, дәрігер тарапынан бірқатар кемшілік болғанын анықтады. Атап айтқанда, зерттеу нәтижелері дұрыс бағаланбаған, бекітілген диагностикалау және емдеу талаптары сақталмаған. Сондай-ақ науқас гастроэнтеролог, инфекционист, гепатолог, хирург және травматолог мамандарына уақытылы жіберілмеген.

Сот мәліметінше, патологиялық қорытынды алынғаннан кейін де науқасты онкологқа жолдау кешіктірілген. Осы жағдайлар қатерлі ісіктің кеш анықталуына және науқастың жағдайының нашарлауына әсер еткен.

Батыс Қазақстан облыстық сотының хабарлауынша, Қазақстан Республикасы Азаматтық кодексінің 921-бабына сәйкес, қызметкердің жұмыс барысында келтірген зияны үшін жұмыс беруші жауап береді. Осыған байланысты жауапкершілік мемлекеттік коммуналдық кәсіпорынға жүктелген.

Сот талап арызды ішінара қанағаттандырып, Бәйтерек ауданының №2 ауруханасына марқұмның әйелі мен баласына моральдық зиян үшін 700 мың теңгеден өтемақы төлеуді міндеттеді.

Сот шешімі әзірге заңды күшіне енген жоқ. Оған шағым беруге болады.