Қазақстанда әскерге шақыру тәртібіне өзгерістер енгізілді. Жаңа талапқа сәйкес, облыстық шақыру комиссиялары аудандық комиссиялардың қабылдаған шешімдерін қайта тексеріп, заң бұзушылық анықталған жағдайда олардың күшін жоя алады, — деп хабарлайды «Dalamedia» ақпараттық порталы.

Үкіметтің жаңа қаулысына сәйкес, енді облыстық шақыру комиссиялары азаматтардың өтініштері мен шағымдарын қарайды. Сонымен қатар әскерге шақыруды кейінге қалдыру немесе әскери қызметтен босату туралы шешімдердің заң талаптарына сәйкестігіне бақылау жүргізеді.

Құжатта аудандық және облыстық маңызы бар қалалардың шақыру комиссиялары азаматты әскери қызметтен босату туралы шешім қабылдаған кезде заң бұзушылық анықталса, облыстық, республикалық маңызы бар қала немесе Астана қаласының шақыру комиссиясы сол шешімнің күшін жоюға құқылы екені көрсетілген.

Жаңа тәртіпке сәйкес, азамат әскери қызметке шақырылуы, шақыруды кейінге қалдыруы, әскери қызметтен босатылуы немесе әскери есептен шығарылып, әскери міндеттен толық босатылуы мүмкін.

Сондай-ақ облыстық шақыру комиссиялары қабылдайтын барлық шешім енді Қорғаныс министрлігінің ақпараттық жүйесінде электронды түрде рәсімделіп, электрондық цифрлық қолтаңбамен бекітіледі.