Инвесторлардың бизнесін мемлекеттік органдар прокурордың келісімінсіз тексере алмайды. Бұл туралы Бас прокуратура жаңа қорғау жүйесін таныстыру кезінде мәлімдеді, — деп хабарлайды «Dalamedia» ақпараттық порталы.

Ведомство басшысы Берік Асыловтың айтуынша, бұл бастама Президент тапсырмасымен қолға алынған. Оның сөзінше, 2025 жылдың желтоқсанынан бастап Бас прокуратураның өкілеттігі кеңейіп, енді ол инвестициялық омбудсмен міндетін де қатар атқарады.

Жаңа жүйенің өзегі — «прокурорлық сүзгі». Енді кез келген мемлекеттік орган инвесторды тексеру үшін міндетті түрде прокурордың келісімін алуы тиіс. Сондай-ақ олардың қызметін тоқтату, лицензиясын қайтарып алу немесе басқа да шектеу қою іс-әрекеттері де осы талапқа бағынады. Егер қандай да бір шешім заңға қайшы болса, прокуратура оның күшін жойып, жауапты тұлғаларды жауапкершілікке тартады.

Бұдан бөлек, инвестициялық жобаларды жеке сүйемелдеу тетігі енгізілмек. Әрбір ірі жобаға нақты бір прокурор бекітіліп, өңірлерде бұл жұмысты облыс прокурорларының орынбасарлары жүргізеді.

Бас прокуратураның дерегінше, бүгінге дейін 2 мыңға жуық инвесторға қолдау көрсетілген. Соның нәтижесінде:

250-ден астам жоба жүзеге асып;

30 мыңға жуық жаңа жұмыс орны ашылған.

Сондай-ақ Бас прокурор Үкімет жанындағы инвестициялық штаб жұмысына да тоқталды. Оның айтуынша, соңғы екі жылда инвестициялық келісімдер көлемі 15 есе өсіп, қаралған жобалардың жалпы құны 100 миллиард доллардан асқан.

Айта кетейік, инвестицияларды қорғауға арналған форумға Президент Әкімшілігі, Үкімет пен Мәжіліс өкілдері, сондай-ақ Еуроодақ, БҰҰ және ЕҚЫҰ сынды халықаралық ұйымдардың өкілдері қатысуда.