Қазақстанда психологиялық қызмет саласын реттейтін жеке заң қабылдау қарастырылып жатыр. Мәжіліс депутаттары «Психологиялық қызмет туралы» заң жобасын бірінші оқылымда қолдады. Жаңа құжат аясында талаптарды бұзған мамандарға айыппұл салу тетігі енгізілмек, ,-деп хабарлайды «Dalamedia» ақпараттық порталы.

Депутат Айна Мусралимованың айтуынша, қоғамда психолог көмегіне сұраныс артқанымен, бұл салада нақты құқықтық жүйе әлі толық қалыптаспаған. Соның салдарынан өзін психолог ретінде таныстырып, қызмет көрсететіндер де кездеседі.

Ұсынылып отырған заң жобасы осы олқылықтың орнын толтырып, психологиялық көмектің бірыңғай тәртібін бекітуді көздейді. Құжатқа сәйкес, барлық психологтар арнайы мемлекеттік тізілімге тіркелуі міндеттеледі. Сондай-ақ олардың білімі, кәсіби дайындығы және біліктілікті арттыру талаптары нақтыланбақ.

Заңда қызмет көрсету кезінде міндетті түрде келісімшарт жасау, клиенттің жазбаша келісімін алу және ақпараттың құпиялығын сақтау нормалары қарастырылған. Психологиялық көмектің түрлері де нақты айқындалады: онлайн, офлайн және аралас формат.

Бұдан бөлек, психологтарға медициналық қызмет көрсетуге және дәрі-дәрмек тағайындауға қатаң тыйым салынады. Ал талаптарды бұзған жағдайда әкімшілік айыппұл салу көзделіп отыр. Егер адамның денсаулығына зиян келсе, жауапкершілік Қылмыстық кодекс аясында қаралады.

Депутат Ирина Смирнова да тізілімге енгізілмеген мамандардың қызметіне байланысты жауапкершілік тетіктерін нақтылау қажеттігін көтерді. Осыған байланысты заңға қосымша түзетулер әзірленіп жатыр.

Жалпы, құжатта психологтардың кәсіби этикасы, құпиялылықты сақтау, клиенттің келісімінсіз ақпарат таратпау секілді талаптар да бекітілген. Сонымен бірге азаматтардың маманды еркін таңдау құқығы сақталады.

Заң жобасын әзірлеушілердің айтуынша, негізгі мақсат – халыққа көрсетілетін психологиялық көмектің сапасын арттырып, қауіпсіздігін қамтамасыз ету.