Қазақстанда интернеттегі заңға қайшы контентті анықтау, оның таралуын шектеу немесе бұғаттау тәртібін бекітетін жаңа ереже жобасы қоғамдық талқыға шығарылды, – деп хабарлайды «Dalamedia» ақпараттық порталы.

Жоба Қазақстандағы интернет кеңістігін бақылау және қауіпсіздігін қамтамасыз ету мақсатында әзірленді. Оның басты ерекшелігі – заңға қайшы ақпаратты тек анықтау емес, сонымен қатар оны репост жасаған пайдаланушыларды да жауапқа тарту мүмкіндігін қарастыру. Бұл қадам заңға қайшы материалдардың интернет арқылы таралуын едәуір шектеуге және қоғамдық ақпарат кеңістігін тазартуға бағытталған.

Ережені әзірлеушілер – Қаржы мониторингі агенттігі. Олар жобаның негізгі міндеті ретінде әлеуметтік желілер мен мессенджерлерде тыйым салынған контентті ертерек анықтап, оны бұғаттау немесе таралуын шектеу жолдарын қарастырады. Бұл ретте тек контент жасаушылар ғана емес, оны қайта тарататын адамдар да жауапкершілікке тартылуы мүмкін.

Жоба 5 наурызда жарияланып, қоғамдық талқылауға 20 наурызға дейін ашық. Барлық азаматтар ұсыныс пен пікірлерін білдіре алады. Сарапшылар жаңа ереже қабылданса, интернет қолданушылары үшін жауапкершіліктің күшейетінін, сонымен бірге ақпарат қауіпсіздігі арта түсетінін атап отыр.