Әскерден құтылып, «ақ билет» алуға көмектесеміз дегендерге сенбеңіз. Бүгін Қорғаныс министрлігінің баспасөз қызметі мәлімдеме жасады, — деп хабарлайды «Dalamedia» ақпараттық порталы.

Соңғы кезде әлеуметтік желіде «ақ билет» алып беруге уәде беретін, «әскери қызметтен босатамыз» деген жарнамалар көбейген. Осыған байланысты Қорғаныс министрлігі түсініктеме берді.

Әскерге шақыру бойынша заңды кеңес берумен тек заңгерлер айналысады. Ал медициналық анықтаманы қолдан жасау, жалған диагноз рәсімдеу немесе әскери қызметтен жалтарудың басқа жолдары үшін қылмыстық жауапкершілік қарастырылған.

Заң аясында мерзімді әскери қызметке шақыруды кейінге қалдыру немесе босату туралы шешімді тек шақыру комиссиясы қабылдайды. Денсаулық сақтау саласының мамандары медициналық тексеру жүргізіп, жарамдылық санатын анықтайды. Нәтижесінде азаматтарды әскерге жөнелту немесе кейінге қалдыру, не болмаса босату туралы шешімдер қабылданады.

ҚР Ата Заңына сәйкес, Отан алдындағы борышын өтеу — әр азаматтың міндеті. Белгіленген мерзімді толық өтеген азаматтарға жоғары оқу орнына ҰБТ тапсырмай-ақ грантқа түсу мүмкіндігі беріледі. Қазіргі таңда 9 мыңнан астам сарбазға еліміздің жоғары оқу орындарында тегін білім алуға арналған сертификаттар табысталған.

Әскерге шақыру Президент жарлықтары мен заңнамаға сәйкес жылына екі рет — наурыз-маусым және қыркүйек-желтоқсан айларында жүргізіледі. 18 бен 27 жас аралығындағы, кейінге қалдыруға немесе босатуға негізі жоқ ер азаматтар әскерге шақырылады.

Азаматтар шақыру қағазын алған жағдайда жергілікті әскери басқару органына келуге міндетті. Егер құжатты жеке табыстау мүмкін болмаса, олардың келуін ішкі істер органдары қамтамасыз етеді.