Алматы тұрғыны №12 қалалық клиникалық аурухана дәрігерлеріне қатысты шағымын жариялады. 36 жастағы Аида Сатыбалдиева жатырдан тыс жүктілік анықталғанына қарамастан, шұғыл операция жасау үшін ақы төлеу қажет болғанын айтқан. — деп хабарлайды «Dalamedia» ақпараттық порталы.Stan.kz ақпарат агенттігіне сілтеме жасап

Әйелдің айтуынша, 5 шілде күні жеке клиникада тексеруден өтіп, жатырдан тыс жүктілік диагнозын алған. УДЗ жасаған маман жағдайдың шұғыл екенін айтып, жедел жәрдем шақыруға кеңес берген.

Алайда Аида Сатыбалдиева уақыт жоғалтпау үшін күйеуі және үш баласымен бірге жақын маңдағы №12 қалалық клиникалық ауруханаға барған. Оның сөзінше, сол жерде акушер-гинеколог Назым Қайсарқызы Аманкелдиева қабылдаған.

Науқастың айтуынша, дәрігер алдымен УДЗ қорытындысын қарамай, операция құнын есептей бастаған. Кейін қайта тексеру жүргізіліп, жатырдан тыс жүктілік диагнозы расталған.

Аида дәрігерден шұғыл операцияның ақылы немесе тегін жасалатынын сұрағанын айтты. Оның сөзінше, медицина қызметкері мұндай көмек ақылы екенін жеткізген.

Әйел бұл жағдайға байланысты Денсаулық сақтау министрлігіне ресми шағым дайындап жатқанын мәлімдеді.

Алматы қаласының денсаулық сақтау басқармасы аталған жағдайға қатысты пікір білдірді. Ведомство мәліметінше, аурухана әкімшілігі қызметтік тексеру жүргізеді. Тексеру нәтижесінде оқиғаның барлық мән-жайы анықталып, медицина қызметкерлерінің әрекетіне тиісті баға беріледі.