Алматыдағы Орталық клиникалық аурухананың дәрігерлері тоғызыншы қабаттан құлаған 17 жастағы қызды аман алып қалды, — деп хабарлайды «Dalamedia» ақпараттық порталы.

Жасөспірім ауруханаға өте ауыр жағдайда жеткізілген. Дәрігерлер оған екінші дәрежелі кома, травмалық және геморрагиялық шок, омыртқа, жамбас және аяқ-қол сүйектерінің көптеген сынуы, сондай-ақ кеуде қуысының ауыр жарақаттары диагнозын қойған.

Мамандардың айтуынша, ең ауыр жарақаттардың бірі диафрагманың жыртылуы болған. Соның салдарынан асқазан, көкбауыр және ішектің бір бөлігі кеуде қуысына ауысып кеткен.

Науқастың өмірін сақтап қалу үшін хирургтер шұғыл түрде күрделі ота жасап, ішкі ағзалар мен өзге де ауыр жарақаттарды қалпына келтірген. Операциядан кейін қыз 12 тәулік бойы жансақтау бөлімінде дәрігерлердің бақылауында болған.

Кейін оған сүйек пен буындарды қалпына келтіруге бағытталған тағы төрт операция жасалды. Жалпы емдеу және қалпына келтіру шаралары 58 күнге созылған.

Қазіргі уақытта бойжеткен ауруханадан шығарылып, оңалту курсынан өтіп жатыр.