Қазақстан халық партиясы Құрылтай депутаттығына 72 кандидатты ұсынды. Үміткерлер қатарында депутаттармен бірге өнер иелері, дәрігерлер, кәсіпкерлер, заңгерлер және қоғам белсенділері бар, — деп хабарлайды «Dalamedia» ақпараттық порталы.

Партияның XXV кезектен тыс съезінде Құрылтай депутаттығына ұсынылған кандидаттардың партиялық тізімі таныстырылды.

Тізімге партия төрағасы Нұрсұлтан Шоқанов, Мәжіліс депутаты Ирина Смирнова, Қазақстанның халық әртісі Тамара Асар, актриса әрі тележүргізуші Аша Матай деген атпен танымал Ақбота Асқарбекова және бұрынғы денсаулық сақтау вице-министрі Ләззат Ақтаева енген.

Съезде партия өкілдері 20 жыл бұрын Мәжіліс сайлауына қатысқан кезде тізімде 20 кандидат болғанын, ал қазіргі таңда бұл көрсеткіш 72 адамға жеткенін атап өтті.

Партия мәліметінше, ұсынылған кандидаттардың орташа жасы — 45 жас. Тізімде жастардың үлесі 12 пайызды, ал әйелдердің үлесі 24 пайызды құрайды. Сонымен қатар кандидаттар арасында қазақ, орыс, ұйғыр, кәріс, татар және грузин ұлттарының өкілдері бар.

Съезд барысында қорытынды тізімді жасақтау үшін 500-ден астам азаматпен жұмыс жүргізілгені айтылды. Партия өкілдерінің сөзінше, олардың барлығы тізімге енбегенімен, бұл бағыттағы жұмыстар жалғасады.

Алайда әлеуметтік желі қолданушылары арасында өнер адамдарының депутаттыққа ұсынылуына қатысты түрлі пікір айтылды. Кейбір азаматтар шоу-бизнес өкілдерінің саясатқа келуіне күмән келтіріп, өз көзқарастарын білдірді.

Ал журналистердің «Неліктен депутат болғыңыз келеді?» деген сұрағына Аша Матай бұл шешімді жүрек қалауымен қабылдағанын айтты.

Құрылтай депутаттарының сайлауы 2026 жылғы 23 тамызда өтеді. Жаңа бір палаталы парламент жаңа Конституция күшіне енгеннен кейін Сенат пен Мәжіліс таратылған соң жасақталады.

Құрылтай құрамына 145 депутат кіреді. Олар партиялық тізім бойынша пропорционалды жүйе арқылы сайланады.