Мәжіліс депутаты Ирина Смирнова мектептердегі бөлім бойынша жиынтық бағалау (БЖБ) мен тоқсандық жиынтық бағалау (ТЖБ) жүйесінен бас тарту туралы бастамаға қатысты пікір білдірді, — деп хабарлайды «Dalamedia» ақпараттық порталы.

Депутаттың айтуынша, бағалаудың бұл түрін енгізуге қомақты қаржы мен уақыт жұмсалған. Сондықтан егер жүйе тиімсіз деп танылып, одан бас тарту туралы шешім қабылданса, оны енгізуге жауапты болған лауазымды тұлғалар да есеп беруі тиіс.

Ол білім беру саласындағы мұндай өзгерістер асығыс қабылданбауы керектігін атап өтті. Смирнованың сөзінше, кез келген шешім жан-жақты талдау, қоғамдық талқылау және сарапшылардың қорытындысы негізінде қабылдануы қажет.

Сондай-ақ депутат қоғамға бұл бастаманың себептері ашық түсіндірілгені жөн екенін айтты. Оның пікірінше, жұртшылық «Неліктен бұл жүйеден бас тарту қажет?» және «Оны енгізгендер қандай жауапкершілік арқалайды?» деген сұрақтарға нақты жауап алуы керек.

Ирина Смирнова бұрын қолданылған бес балдық жүйеде көбіне үш, төрт және бес деген бағалар қойылғанын еске салды. Сонымен қатар ол БЖБ мен ТЖБ-ның да белгілі бір артықшылықтары болғанын жеткізді.

Еске сала кетейік, бұған дейін Мәжіліс депутаты Жұлдыз Сүлейменова қазақстандық мектептерде БЖБ мен ТЖБ-дан кезең-кезеңімен бас тарту мүмкіндігі қарастырылып жатқанын мәлімдеген болатын. Оның айтуынша, Оқу-ағарту министрлігі қазіргі бағалау жүйесіне жан-жақты талдау жүргізіп жатыр.

Ведомство өкілдерінің мәліметінше, қазіргі таңда мектептерде диктант, мазмұндама және шығарма секілді бағалаудың жекелеген түрлері қайта енгізілуде. Осыған байланысты министрлік ТЖБ жүйесінен біртіндеп бас тарту мәселесін қарастырып жатыр.