Мәжіліс төрағасы Ерлан Қошанов «Amanat» партиясының ресурстарын жаңадан құрылуы мүмкін «Әділет» партиясымен біріктіру жөнінде ұсыныс айтты ,-деп хабарлайды «Dalamedia» ақпараттық порталы. Оның сөзінше, «Amanat» үшін белгілі бір тарихи кезең аяқталып келеді, ал елге қазір бөліну емес, керісінше біріктіретін бастамалар қажет.

Қошанов бұл қадамды ел ішіндегі ірі өзгерістер кезеңінің қорытындысымен байланыстырды. Ол Президенттің Қазақстан тұрақты даму жолына түсті деген пікірін еске салып, партияның да қоғаммен бірге жаңарып отыруы тиіс екенін атап өтті. «Amanat» басшысының айтуынша, ұйым әр кезеңде елмен бірге өзгеріп келген, сондықтан қазіргі съездің мәні айрықша.

«Партия ретінде елмен бірге өсіп, жаңарып келген ұйымның өмірінде де бір кезеңнің аяқталған сәті келіп отыр. Сондықтан бүгінгі съезд – ерекше, маңызды жиын», – деді ол.

Сонымен қатар, ол партия өз міндетін атқарғанын, бірақ қоғам санасында оның өткенімен байланысты әртүрлі көзқарастардың әлі де сақталып отырғанын да жасырмады. Қошанов мұны кез келген ірі саяси күштің тарихына тән құбылыс ретінде сипаттады.

«Ашығын айту керек, халықпен ашық диалог орнағанымен, қоғамда партияның өткеніне қатысты әртүрлі бағалар мен түсініктер әлі де бар. Бұл – үлкен тарихы бар кез келген саяси ұйымға тән жағдай», – деді Мәжіліс төрағасы.

Оның айтуынша, қазіргі кезеңде партия елдің сұранысына сай әрекет етіп, жаңа бағытқа бет бұруы тиіс. Осы тұрғыда ол ұйымның жаңа парақ ашуы қажет екенін жеткізді.

«Бүгін елге жаңа бөлінулер емес, керісінше бірігетін тұстар қажет. Сондықтан осы жауапты сәтте ресурстарымызды жаңа “Әділет” партиясымен біріктіруіміз керек», – деді Ерлан Қошанов.