Ресейдің Алтай Республикасы аумағында болған жол-көлік оқиғасынан Қазақстанның төрт азаматы зардап шекті. Жарақат алғандардың арасында 15 жастағы жасөспірім қыз да бар, — деп хабарлайды «Dalamedia» ақпараттық порталы.

Алтай Республикасы Ішкі істер министрлігінің мәліметінше, жол апаты 7 шілде күні таңғы сағат 08:00 шамасында Оңғудай ауданы аумағындағы Белый Бом ауылы маңында болған.

Алдын ала ақпарат бойынша, Қазақстан азаматы басқарған Changan X5 Plus автокөлігі жолдан шығып кетіп, жыраға аударылған. Көлік тізгінінде болған 47 жастағы жүргізуші рөлге ие бола алмай қалған.

Апат салдарынан жүргізуші мен көлікте болған үш жолаушы, оның ішінде 15 жастағы қыз түрлі жарақат алған. Зардап шеккендердің барлығы Оңғудай аудандық ауруханасына жеткізілді.

Қазіргі уақытта жол-көлік оқиғасына байланысты тексеру жұмыстары жүргізіліп жатыр. Оның қорытындысы бойынша заң талаптарына сәйкес тиісті процессуалдық шешім қабылданады.