Қостанай қаласында бес күдіктіні сотқа жеткізіп бара жатқан полицияның қызметтік көлігі жол апатына ұшырады, ,-деп хабарлайды «Dalamedia» ақпараттық порталы.

Оқиға 16 маусым күні Бәймағамбетов пен Гоголь көшелерінің қиылысында болған. Қызметтік Jac автокөлігі жеңіл көлікпен соқтығысып, салдарынан аударылып қалған.

Қостанай облыстық полиция департаментінің мәліметінше, қызметтік көлік бес күдіктіні сотқа апара жатқан. Алдын ала дерек бойынша, арнайы жарық белгілерін қосып келе жатқан қызметтік автокөлік қиылыстан өтер кезде қозғалыс қауіпсіздігін толық қамтамасыз етпеген. Соның салдарынан Гоголь көшесімен жасыл бағдаршамға өтіп бара жатқан Chevrolet Cobalt көлігімен соқтығысқан.

Оқиға орнына төрт жедел жәрдем бригадасы жеткен. Апаттан кейін қызметтік көлікте болған бес адам қалалық ауруханаға жеткізіліп, дәрігерлердің тексеруінен өтті.

Полицияның хабарлауынша, жол-көлік оқиғасы кезінде жарақат алған екі полиция қызметкері әлі де ауруханада тексеруден өтіп жатыр.

Қазір апаттың нақты себептері мен мән-жайын анықтау жұмыстары жүргізілуде. Тексеру қорытындысы бойынша тиісті процессуалдық шешім қабылданады.