Қостанай облысында мұз үстіне шыққан екі азамат ажал аузынан аман қалды. Оқиға кешкі уақытта Рудный қаласынан шамамен 10 шақырым жердегі Сергеев су қоймасында болған — деп хабарлайды «Dalamedia» ақпараттық порталы.

Төтеншеліктердің айтуынша, мұз үстіндегі екі ер адам абайсызда суға түсіп кеткен. Оқиға орнына жеткен құтқарушылар мен полиция қызметкерлері дереу іске кірісіп, іздестіру-құтқару жұмыстарын жүргізген.

Жедел әрекеттің арқасында балықшылар судан шығарылды. Оларға алғашқы медициналық көмек көрсетіліп, кейін жедел жәрдеммен Рудный қалалық ауруханасына жеткізіліпті.

Төтенше жағдайлар министрлігі көктем мезгілінде мұздың жұқарып, аса қауіпті болатынын ескертеді. Мамандар бұл уақытта мұз үстіне шығу өмірге тікелей қатер төндіретінін айтады.