Боливияның Эль-Альто қаласында жаңа банкноттар тиеген әскери ұшақ жолға құлап, салдарынан 15 адам көз жұмды, – деп хабарлайды «Dalamedia» ақпараттық порталы.

Шетелдік БАҚ-тың жазуынша, Боливия әуе күштеріне тиесілі Hercules ұшағы Орталық банктен өзге қалаларға жаңа ақша тасымалдап бара жатқан. Алайда әуе кемесі ұшу-қону жолағынан шығып кетіп, қала маңындағы көлік қозғалысы тығыз тас жолға құлаған. Кейін жақын маңдағы егістік алқапта тоқтаған.

Апат салдарынан экипаж мүшелерін қоса алғанда 15 адам қаза тауып, тағы 12 адам түрлі жарақат алған. Тас жол бойындағы ондаған көлік зақымданған.

Ұшақ құлаған аймақта көп мөлшерде ақша шашылып, оны жинауға жүздеген адам жиналған. Тәртіп сақшылары адамдарды тарату үшін арнайы құралдарды қолдануға мәжбүр болды.