Түркістан облысында жаңажылдық мерекелер басталмай жатып, пиротехниканы абайсыз қолданудың соңы қайғылы жағдайға ұласа жаздады. Сарыағаш ауданында ересектердің қарауынсыз отшашу атқан екі бала түрлі дәрежедегі дене жарақатын алып, ауруханаға жеткізілді. Қазіргі уақытта жасөспірімдердің өміріне қауіп төніп тұрған жоқ, дәрігерлер қажетті медициналық көмек көрсетуде.

Осы оқиғаға байланысты облыстық Төтенше жағдайлар департаменті ата-аналарға үндеу тастап, балалар қауіпсіздігіне барынша мұқият болуды сұрады. Түркістан облысы ТЖД Мемлекеттік өрт бақылау басқармасы бастығының орынбасары Жасұлан Айнабектің айтуынша, пиротехникалық бұйымдарды балалардың пайдалануына қатаң тыйым салынған. Мамандар мұндай заттарды тек ересектердің қауіпсіздік ережелерін сақтай отырып, адамдар көп жиналатын орындар мен тұрғын үйлерден алыс жерде қолдануы керектігін ескертеді.