Асламбек Мерғалиев қайтадан Қазақстан Республикасы Жоғарғы сотының төрағасы қызметіне келді, — деп хабарлайды «Dalamedia» ақпараттық порталы.

Конституциялық сот жаңа Конституция күшіне енгеннен кейін бірқатар лауазымды тұлғаларды сол қызметке қайта сайлау немесе тағайындау тәртібіне қатысты түсіндірме берді.

2026 жылғы 7 шілдедегі №89-НҚ нормативтік қаулыда адамның белгілі бір қызметке бұрын сайлануы немесе тағайындалуы тек қолданыстағы Конституцияда белгіленген тәртіппен қарастырылатыны айтылған.

Конституциялық соттың түсіндіруінше, 1995 жылғы Конституция қолданыста болған кезеңде атқарылған қызмет мерзімі және сол уақыттағы сайлану немесе тағайындалу фактілері жаңа Конституцияда белгіленген шектеулерді қолдану кезінде есепке алынбайды.

Яғни бұрынғы Конституция талаптарына сәйкес атқарылған қызмет жаңа Конституция күшіне енгеннен кейін сол лауазымға қайта сайлануға немесе тағайындалуға құқықтық кедергі болмайды.

Сот бұл түсіндірмені Президенттің өтініші негізінде берген. Қаулыға сәйкес, 1995 жылғы Конституция кезеңінде тиісті қызметтерді атқарған тұлғалар жаңа Негізгі заң күшіне енгеннен кейін сол лауазымдарға қайта сайлана немесе тағайындала алады.