Конституциялық сот «Алатау қаласының арнаулы құқықтық режимі туралы» Конституциялық заңның Ата заңға сәйкестігін тексеруді аяқтап, тиісті қорытынды шығарды, — деп хабарлайды «Dalamedia» ақпараттық порталы.

Аталған мәселе Мемлекет басшысының өтініші негізінде қаралған. Құжат биыл 27 наурызда Парламент тарапынан қабылданып, 31 наурызда Президенттің қол қоюына жолданған.

Сот мәліметінше, заң Парламент палаталарының бірлескен отырысында Конституцияда көрсетілген тәртіп толық сақтала отырып, өз құзыреті шегінде қабылданған. Құжатта Алатау қаласының арнаулы құқықтық режимінің мақсаты мен міндеттері, негізгі қағидаттары, мемлекеттік басқару құрылымы, органдардың құрылу тәртібі мен өкілеттіктері, сондай-ақ жекелеген қызмет түрлерін реттеу ерекшеліктері мен өтпелі кезең нормалары қамтылған.

Конституциялық сот бұл заң нормаларының басым бөлігі кезең-кезеңімен енгізілетінін атап өтті. Сонымен қатар олар 2026 жылғы 15 наурызда өткен республикалық референдумда қабылданған Конституция талаптарына сай әзірленген және заңдағы жаңа тетіктерді жүзеге асыруға құқықтық негіз қалайды.

Сот сондай-ақ егемендік пен тәуелсіздікті сақтау, азаматтардың құқықтары мен бостандықтарын қорғау, заң үстемдігін қамтамасыз ету және халықтың әл-ауқатын арттыру мемлекет қызметінің басты қағидаттары екенін еске салды. Бұған қоса, адам капиталын, білім мен ғылымды, инновацияны дамыту стратегиялық бағыт ретінде айқындалған. Ал «қарқынды дамитын қала» ретінде арнайы құқықтық режим енгізу мүмкіндігі жаңа Конституцияда бекітілгені атап өтілді.

Осы нормалар Алатау қаласы әкімдігі мен оның құрылымдары қабылдайтын барлық құқықтық актілерде қатаң сақталуы тиіс.

Сондай-ақ, заңдағы өтпелі ережелер бұрын жасалған инвестициялық келісімдерге, шарттарға және жер қойнауын пайдалану лицензияларына қатысты құқықтық тұрақтылықты қамтамасыз етуге бағытталғаны және қолданыстағы Конституцияға қайшы келмейтіні айтылған.

Қарау нәтижесінде Конституциялық сот аталған заңды Қазақстан Республикасының Конституциясына толық сәйкес деп таныды.