Соттың баспасөз қызметінің мәліметінше, өтініш негізінде «Қазақстан Республикасындағы банктер және банк қызметі туралы» заңның 50-бабы 4-тармағының ел Конституциясына сәйкестігі тексерілмек. Қолданыстағы нормаға сәйкес, банк құпиясына жататын ақпарат тек шот иесіне немесе оның келісімімен үшінші тұлғаға ғана беріледі.

Өтініш иесі бұл талап ерлі-зайыптылардың біріне ортақ жинақтар туралы мәлімет алуға кедергі келтіреді деп есептейді. Оның пікірінше, мұндай шектеу некеде жиналған ортақ мүліктегі үлеске қатысты құқықты жүзеге асыруды қиындатады.

Әйелдің айтуынша, неке бұзылғаннан кейін ортақ мүлікті бөлу үшін талап-арыз дайындау барысында бұрынғы күйеуінің неке кезінде жинаған қаражаты туралы мәлімет ала алмаған. Осы себепті ол екінші деңгейлі банктерді қажетті ақпарат беруге міндеттеу туралы талаппен сотқа жүгінген. Алайда сот оның талаптарын қанағаттандырмаған.

Конституциялық соттағы отырысқа өтініш иесі мен оның заң кеңесшісі, сондай-ақ Парламент палаталарының, Бас прокуратураның, Ұлттық банктің, Қаржы нарығын реттеу және дамыту агенттігінің, Әділет министрлігінің және бірқатар құқықтық институттардың өкілдері қатысты.