Карта иелерінің келісімінсіз шотты бұғаттайтын алаяқтық түрі көбейген. Бұл туралы ұлттық банк мәлімдеді, — деп хабарлайды «dalamedia» ақпараттық порталы.

Ұлттық банк мамандарының айтуынша, қаскөйлер азаматтардың жеке деректерін фишингтік сайттар, қоғамдық орындардағы сауалнамалар, әлеуметтік желілер және маркетплейстерден жинайды. Осы ақпаратты пайдаланып, өздерін клиент ретінде таныстырып, банктердің байланыс орталығына хабарласады. Картаның жоғалғаны жөнінде жалған мәлімет беріп, оны бұғаттатуға әрекет жасайды.

Осыдан кейін алаяқтар карта иесіне қоңырау шалып, өзін банк немесе құқық қорғау органының қауіпсіздік қызметкері ретінде таныстырады. «картаны қайта іске қосамыз» немесе «қаражатты қауіпсіз шотқа аударамыз» деген сылтаумен sms-кодты, интернет-банкингке арналған құпиясөзді, сондай-ақ cvv/cvc-кодты сұратады.

Мамандар карта бұғатталған жағдайда оның артқы бетінде немесе мобильді қосымшада көрсетілген ресми нөмір арқылы ғана банкке хабарласуға кеңес береді. Қаржы ұйымдарының қызметкерлері sms арқылы келген кодты немесе құпиясөзді ешқашан сұрамайтынын, сондай-ақ қашықтан басқару қосымшаларын орнатуды талап етпейтінін атап өтті.

Банкомат маңында бөгде адамдар «картам бұғатталды» немесе «лимит таусылды» деп ақша аударуды өтінеді. Осындай себеппен тіркелген алаяқтық жиі кездеседі, — дейді мамандар. Бұл әрекеттер заңға қайшы және дропперлік схема ретінде бағалануы да мүмкін.

Осы орайда ұлттық банк азаматтарды карта деректерін ешкімге бермеуге, бейтаныс тұлғаларға ақша аудармауға және күмәнді ақпаратты тек банктердің ресми байланыс арналары арқылы тексеруге шақырады. Сондай-ақ ұлттық банк қызметкерлері жеке тұлғалардың шоттарына қызмет көрсетпейтінін, аудио немесе бейнеқоңырау шалмайтынын, инвестициялық қорларға қаржы салуды ұсынбайтынын және халықпен тікелей ақшалай есеп айырысу жүргізбейтінін еске салады.