Конституциялық сот жаңа Конституция күшіне енгеннен кейін кейбір лауазымды тұлғалардың өз қызметіне қайта сайлануы немесе тағайындалуы заң талаптарына қайшы келмейтінін түсіндірді, — деп хабарлайды «Dalamedia» ақпараттық порталы.

2026 жылғы 7 шілдедегі №89-НҚ нормативтік қаулыда адамның белгілі бір қызметке бұған дейін сайлануы немесе тағайындалуы тек қолданыстағы Конституцияда белгіленген тәртіппен есептелетіні көрсетілген.

Сот мәліметінше, 1995 жылғы Конституция кезеңінде атқарылған қызмет мерзімі мен сол уақыттағы сайлану немесе тағайындалу фактілері жаңа Конституция бойынша қойылатын шектеулерді есептеу кезінде ескерілмейді.

«Конституцияның 43-бабының 1-тармағында, 72-бабының 2 және 3-тармақтарында, 83-бабының 1-тармағында және 84-бабының 3-тармағында белгіленген шектеулер қолданылған жағдайда, 1995 жылғы Негізгі заң қолданыста болған кезеңдегі тиісті лауазымдарда болу мерзімдерін есепке алуды қарастыратын нормалар Конституцияда көзделмеген», — делінген хабарламада.

Яғни бұрынғы Конституция талаптары бойынша атқарылған қызмет кезеңі жаңа Конституция аясында қайта сайлануға немесе тағайындалуға құқықтық кедергі болмайды.

Конституциялық сот бұл түсіндірмені президенттің өтініші негізінде берді. Сот шешіміне сәйкес, 1995 жылғы Конституция нормалары бойынша тиісті лауазымдарды атқарып отырған тұлғалар жаңа Конституция күшіне енгеннен кейін де сол қызметтерге сайлана немесе тағайындала алады.

Еске салайық, бұған дейін жаңа Конституция талаптарына сәйкес Қасым-Жомарт Тоқаевтың президент сайлауына қайта қатысу мүмкіндігі туралы ақпарат тараған болатын.