Конституциялық сот президенттің сайлауға қатысуына қатысты Конституция нормаларын ресми түрде түсіндірді, — деп хабарлайды «Dalamedia» ақпараттық порталы.

Сот Конституцияның бірқатар баптары мен тармақтарын түсіндіру туралы өтінішті қарап, тиісті шешім қабылдады. Ведомство мәліметінше, 1995 жылғы Конституцияда белгіленген нормаларға сәйкес, аталған лауазымдарды атқарып отырған тұлғалар, оның ішінде президент, 2026 жылғы Конституция күшіне енгеннен кейін сол қызметтерге қайта сайлана немесе тағайындала алады.

Конституциялық соттың түсіндіруінше, жаңа Конституция күшіне енгеннен кейін қолданысқа енгізілетін шектеулер бұрын сайланған немесе тағайындалған тұлғалардың қайта қатысуына кедергі келтірмейді. Яғни бұл жағдайда президент сайлауына қатысу жаңа конституциялық талаптар бойынша алғашқы рет сайлану ретінде қарастырылады.

Осыған байланысты Қасым-Жомарт Тоқаев президенттік сайлауға қайта қатысуға құқылы.

Еске салайық, 2022 жылы Қазақстан Конституциясына өзгерістер енгізіліп, президент жеті жыл мерзімге бір рет қана сайланады деген норма бекітілген болатын. Бұл өзгеріс биліктің бір қолға шоғырлануына жол бермеу мақсатында енгізілген еді.