Қазақстан мектептерінде 11-сынып оқушыларына жаңа Конституцияны түсіндіруге арналған арнайы сабақтар ұйымдастырылды. Бұл шара Бірыңғай «Адал Азамат» білім беру бағдарламасы аясында елдің барлық өңірінде бір мезетте өтті, -деп хабарлайды «Dalamedia» ақпараттық порталы.

Сабақтың негізгі тақырыбы – «Білім беру мемлекеттік саясаттың басты құндылығы ретінде: Жаңа Конституцияның басымдықтары». Оқу-ағарту министрлігінің мәліметінше, мұндай сабақтардың басты мақсаты – оқушылардың құқықтық сауатын арттыру, Конституцияның негізгі нормаларын түсіндіру және азаматтық жауапкершілікті қалыптастыру.

Сынып сағаттарында оқушылар Ата заңның негізгі қағидаларымен танысып, заңға құрметпен қарау мен құқықтық мәдениетті дамыту мәселелеріне ерекше көңіл бөлді. Бір форматта өткен сабақтар еліміздің түкпір-түкпіріндегі оқушыларды ортақ құқықтық тақырып төңірегінде біріктіруге мүмкіндік берген.

Айта кетейік, бұған дейін жаңа Конституцияны мектептер мен жоғары оқу орындарында оқыту туралы ұсыныс көтерілген еді.