Қазақстан Республикасының Конституциялық Соты жаңа Конституцияның күшіне енуіне орай «Жаңа Конституция: орнықты дамудың институционалдық және құқықтық негізі» атты ғылыми-практикалық конференция өткізді, деп хабарлайды «Dalamedia» ақпараттық порталы.

Іс-шараға Жамбыл облысы әкімінің бірінші орынбасары Нұржан Календеров қатысып, конституциялық реформалардың маңызы талқыланған жиын жұмысына атсалысты.

Конференцияны Конституциялық Соттың Төрағасы Эльвира Азимова ашып, республикалық референдумда қабылданған жаңа Конституцияның 2026 жылғы 1 шілдеден бастап заңды күшіне енетінін айтты. Оның сөзінше, бұл құжат Қазақстанның конституциялық дамуының жаңа кезеңіне жол ашып, мемлекеттік басқару жүйесін, құқықтық тетіктерді және адам құқықтарын қорғау ісін одан әрі жетілдіруге негіз болады. Сондай-ақ Конституциялық Соттың Ата Заңның үстемдігін қамтамасыз етіп, конституциялық құндылықтарды қорғаудағы рөлі күшейетінін атап өтті.

Конференцияға бейнебайланыс арқылы қатысқан Раднарагча Саранго, Қайрат Сарыбай, Рамиль Гасан және Феруза Эшматова Қазақстандағы конституциялық реформалардың құқықтық институттарды нығайтудағы маңызына тоқталып, жаңа өзгерістерге халықаралық деңгейде қызығушылық жоғары екенін жеткізді.

Пікірталас барысында жаңа Конституцияның құқықтық жүйені жетілдірудегі орны, заң үстемдігін қамтамасыз ету, сот төрелігінің қолжетімділігі, қоғамдық келісімді нығайту, адам құқықтарын қорғау, цифрлық құқықтарды дамыту және құқықтық мәдениетті арттыру мәселелері сөз болды. Сондай-ақ Конституцияға ғылыми түсіндірме әзірлеу бастамасы да талқыланды.

Жиында қазақстандық ғалымдар, Конституциялық Сот пен Конституциялық комиссия өкілдері, жоғары оқу орындары мен сарапшылық ұйымдардың мамандары баяндама жасады. Сонымен қатар бейнебайланыс арқылы Ричард Альберт және Тьерри де Монбриаль сөз сөйлеп, Қазақстандағы реформалардың құқық үстемдігін нығайту мен орнықты дамуды қамтамасыз етудегі маңызын атап өтті.

Конференция аясында Үкіметтің бастамасымен «Инклюзивті қоғам үшін Конституция» жобасы бойынша Брайль қарпімен басылған Қазақстан Республикасы Конституциясының таныстырылымы өтті.

Сондай-ақ Конституциялық Соттың Төрағасы Эльвира Азимова мен Бекежан Жәкеев жаңа Конституцияның күшіне енуіне арналған арнайы пошта маркасына салтанатты түрде мөр басты.

Конференция қорытындысында қатысушылар жаңа Конституция Қазақстанның алдағы дамуына берік құқықтық әрі институционалдық негіз қалыптастырған маңызды құжат екенін атап өтті.