Ресей тарапы Қазақстанның Энергетика министрлігіне жанармай сатып алу жөнінде ресми өтініш жолдаған жоқ, — деп хабарлайды «Dalamedia» ақпараттық порталы.

Бұл туралы Үкімет отырысында энергетика вице-министрі Қайырхан Тұтқышбаев мәлімдеді. Оның айтуынша, ведомствоға Ресейден отын жеткізуге қатысты ешқандай ресми сұраныс түспеген.

«Энергетика министрлігіне Ресей Федерациясынан ешқандай ресми сұраныс келіп түскен жоқ. Егер мұндай ұсыныс түссе, оны ұлттық мүддені ескере отырып және екі тарапқа да тиімді шарттар негізінде қарастырамыз», — деді Қайырхан Тұтқышбаев.

Вице-министр басқа арналар арқылы осындай өтініштер болған-болмағаны туралы нақты жауап бермеді. Ол тек Қазақстанның Энергетика министрлігіне Ресей тарапынан ресми түрде өтініш түспегенін атап өтті.

Бұған дейін Ресейдің бірқатар өңірінде жанармай тапшылығы байқалып, Иркутск облысы, Забайкалье өлкесі және Пенза облысында жоғары дайындық режимі енгізілгені хабарланған болатын.

Осыған байланысты кей аймақтарда жанармай сатуға шектеу қойылып, жүргізушілерге бір ретте 30-50 литрден артық бензин бермеу тәртібі енгізілген.

Сарапшылар бұл жағдай Қазақстанмен шекара маңындағы көлеңкелі жанармай саудасының өсуіне, сондай-ақ Ресейден келетін авиациялық отын көлеміне әсер етуі мүмкін екенін айтқан. Бұл өз кезегінде халықаралық әуе билеттері бағасының қымбаттауына және теңге бағамына қысымның күшеюіне ықпал етуі ықтимал.