Мәжіліс депутаты Ермұрат Бәпи Алматыда Hilton қонақүйін күшпен басып алу әрекеті жүріп жатқанын айтып, бұл жағдайға байланысты депутаттық сауал жолдағанын мәлімдеді. Оның сөзінше, оқиға заңсыз сот орындаушысының шешімі негізінде өрбіп жатыр, — деп хабарлайды «Dalamedia» ақпараттық порталы.

Депутаттың айтуынша, қонақүйдің мүлкі заңды иелерінен тартып алынған. Ол бұл нысанда шамамен 250 адам жұмыс істейтінін, ал жағдайдың шетелдік қонақтардың көз алдында өтіп жатқанын да атап өтті. Бәпи мұндай әрекеттердің артында «Ескі Қазақстанның сарқыншақтары» тұрғанын алға тартты.

«Алматыда заңсыз сот орындаушысының шешімі негізінде Hilton қонақүйін күшпен басып алу әрекеті жүріп жатыр. Бұл — өзгенің мүлкін заңсыз әрі әділетсіз жолмен иемдену. Осыдан төрт жыл бұрын да бұл қонақүйге қатысты депутаттық сауал жолдаған едім, алайда мемлекеттік органдардан нақты жауап болмады», – деді ол.

Ермұрат Бәпидің айтуынша, бұған дейін Қайрат Сатыбалды түрмеден шыққаннан кейін мемлекетке бірқатар активтер қайтарылған, олардың қатарында осы қонақүй де болған. Депутаттың сөзіне қарағанда, кейін бұл нысан әртүрлі схемалар арқылы өзге компаниялардың атына рәсімделген.

«Қазір түрлі тәсілдермен қонақүйді қайтадан иемденіп, оны Мемлекеттік кірістер комитеті арқылы аукционға шығарып отыр», – деді депутат.

Сонымен қатар, Бәпи Активтерді қайтару жөніндегі комиссия қонақүйді 4,5 миллиард теңгеге бағалағанын, ал оның нарықтағы құны шамамен 12 миллиард теңге екенін айтып, нысанның әдейі төмен бағаланған болуы мүмкін екенін жеткізді.

Депутат бұл жағдайға құқықтық баға беріп, тексеру жүргізуді сұрады және мәселе Мемлекет басшысына дейін жетеді деген үмітін білдірді.