Әлеуметтік желіде бірнеше номиналдағы банкноттардың қолданыстан шығатыны туралы ақпарат қызу талқыға түсті. Осыған байланысты Қазақстан Ұлттық банкі ресми түсініктеме берді, — деп хабарлайды «Dalamedia» ақпараттық порталы.

Мәліметке сәйкес, кейбір ескі үлгідегі купюралар біртіндеп жаңа сериядағы ақшалармен ауыстырылады. Алайда олар бірден жарамсыз болып қалмайды және белгілі бір уақытқа дейін айналымда бірге қолданылады.

Айналымнан кезең-кезеңімен шығарылатын банкноттар қатарында 500, 1000, 2000, 10 000 және 20 000 теңгелік купюралар бар. Ұлттық банк олардың әрқайсысына нақты мерзім белгіленгенін мәлімдеді.

Атап айтқанда:
– 2017 жылғы 500 теңге 2027 жылдың 24 желтоқсанына дейін;
– 2014 жылғы 1000 теңге 2027 жылдың 27 наурызына дейін;
– 2012 жылғы 2000 теңге 2026 жылдың 24 маусымына дейін;
– 2012 жылғы 10 000 теңге 2027 жылдың маусымына дейін қолданыста болады. Ал 20 000 теңгелік ескі үлгідегі банкноттар жаңа серия шыққаннан кейін біртіндеп алмастырылады.

Ұлттық банктің мәліметінше, параллель айналым мерзімі аяқталғаннан кейін де азаматтар ескі купюраларды екінші деңгейлі банктерде, «Қазпошта» бөлімшелерінде және Ұлттық банк филиалдарында айырбастай алады.