Биыл Қазақстанның төрт өңірінде су тапшылығы туындау қаупі бар. Атап айтқанда, Сырдария, Шу және Талас өзендерінің бассейндеріне кіретін Қызылорда, Түркістан және Жамбыл облыстарында, сондай-ақ Алматы облысында су азаюы ықтимал, — деп хабарлайды «Dalamedia » ақпараттық порталы.

Бұл туралы Үкімет отырысында Су ресурстары және ирригация министрі Нұржан Нұржігітов мәлімдеді.

Министрдің айтуынша, өткен жылғы қуаңшылық көрші елдердегі су қоймаларына әсер етіп, биыл Қазақстанға келетін су көлемін азайтуы мүмкін.

«Жаз мезгілінде көрші елдердегі су қоймалары су жинау режимінде жұмыс істейді. Сондықтан елімізге келетін су көлемі әдеттегі мөлшердің шамамен 70 пайызы ғана болуы ықтимал. Осыған байланысты Сырдарияның орта және төменгі ағысындағы өңірлерде су тапшылығы қаупі артады», – деді министр.

Оның айтуынша, Шу және Талас өзендері бассейндерінде де ұқсас жағдай қалыптасып отыр. Киров су қоймасы 78 пайызға, Орто-Токой су қоймасы 83 пайызға толған, бұл өткен жылмен салыстырғанда айтарлықтай төмен.

«Осыған байланысты Талас өзенінде су көлемі қалыпты деңгейден аз болады. Шу өзенінде де су мөлшері 50-75 пайыз аралығында сақталуы мүмкін. Вегетациялық кезең бойы су тапшылығы тәуекелі бар», – деді Нұржігітов.

Сонымен қатар Алматы облысындағы Күрті су қоймасында да су азайған. Қазіргі көлемі 64 миллион текше метр, бұл өткен жылмен салыстырғанда 38 миллион текше метрге төмен.

Министрдің мәліметінше, Шу-Талас бассейніндегі су қоймалары жалпы 81 пайызға толғанымен, көрші елдердегі су қорының азаюы алаңдаушылық туғызып отыр. Осыған байланысты 2026 жылға арналған су пайдалану лимиті 1,2 миллиард текше метрден 900 миллион текше метрге дейін қысқартылған.

Жалпы алғанда, еліміздің ішкі су қоймаларындағы жағдай салыстырмалы түрде тұрақты. 5 мамырдағы дерек бойынша оңтүстік өңірлерде 26,2 миллиард текше метр су жиналған, бұл өткен жылмен салыстырғанда 500 миллион текше метрге көп.

Балқаш-Алакөл бассейні 97 пайыз, Қапшағай су қоймасы 98 пайыз, ал Шардара су қоймасы 99 пайызға толған. Арал-Сырдария бассейніндегі ірі су қоймалары да 87 пайыз деңгейінде.

Қызылорда және Түркістан облыстарына егін суаруға тиісінше 3,2 және 3,8 миллиард текше метр су лимиті бекітілді.

Үкімет басшысы Олжас Бектенов тиісті министрліктерге су тапшылығының алдын алуға бағытталған нақты шараларды күшейтуді тапсырды. Оның айтуынша, ауыл шаруашылығында су үнемдеу технологияларын енгізу, тамшылатып және жаңбырлатып суару жүйесін кеңейту қажет.

Сондай-ақ суармалы суға қатысты жағдай тұрақты бақылауда болуы тиіс екені айтылды. Үйлестіру жұмысы вице-премьер Серік Жұманғаринге жүктелді.