Қазақстанда Конституция күніне байланысты қосымша демалыс күнін енгізу мәселесі қоғам тарапынан сұраныс болса қаралуы мүмкін. Бұл туралы Еңбек және халықты әлеуметтік қорғау вице-министрі Виктория Шегай мәлімдеді, — деп хабарлайды «Dalamedia» ақпараттық порталы.

Үкіметтегі брифинг барысында вице-министр журналистердің Конституция күніне қатысты мерекелік демалыс күндерін көбейту жөніндегі сауалына жауап берді. Ол өз сөзінде бұған дейін 16 желтоқсан – Тәуелсіздік күніне орай екі күндік демалыс қарастырылғанын да еске салды.

Виктория Шегайдың айтуынша, Конституцияға енгізілген өзгерістерден кейін 25 қазан ұлттық мереке мәртебесін алып, ресми демалыс күні ретінде бекітілген.

«Конституция күніне келсек, жаңа Конституция қабылданғаннан кейін 25 қазан да мереке күні ретінде белгіленді. Сондықтан бұл ресми демалыс күні болып саналады», – деді ол.

Журналистер қосымша демалыс күнін енгізу мүмкіндігіне қатысты нақтылаған кезде, вице-министр бұл мәселе қоғам пікіріне қарай қаралатынын айтты.

«Екі күндік демалысқа қатысты мәселе азаматтардың сұранысын ескере отырып қарастырылуы мүмкін. Қазір нақты шешім айта алмаймын», – деді Виктория Шегай.

Вице-министр мұндай бастаманың болашақта қайта қаралуы ықтимал екенін де жоққа шығармады.