Қазақстанның Көлік министрлігі ақылы автожолдарда жүру ақысын төлеу тәртібіне өзгеріс енгізді — деп хабарлайды «Dalamedia» ақпараттық порталы.

Жаңа ережеге сәйкес, жүргізушілерге төлем жасау үшін бұрынғыдан көбірек уақыт беріледі. Бұған дейін жол ақысын 7 күн ішінде төлемеген жағдайда, сегізінші күні материалдар көлік бақылау органдарына жіберілетін.

Енді бұл талап жеңілдетілді. Жеке тұлғалар үшін төлем мерзімі 30 күнге дейін ұзартылды. Егер осы уақыт ішінде ақы төленбесе, іс 31-күні тиісті органдарға жолданады.

Ал заңды тұлғаларға бөлек тәртіп енгізілді. Олар жол ақысын есепті айдан кейінгі айдың 20-сынан кешіктірмей төлеуі тиіс. Төлем жасалмаған жағдайда, материалдар келесі күні бақылау органдарына беріледі.

Министрлік бұл өзгерістер жүргізушілерге қолайлы жағдай жасап, кешіктірілген төлем үшін жауапкершілікке тарту жағдайларын азайтуға бағытталғанын атап өтті.

Жаңа талаптар ресми жарияланған күннен кейін 10 күн өткен соң күшіне енеді.