Қазақстанда жаңа Салық кодексіне қосымша түзетулер енгізу мәселесі қарастырылып жатыр. Бұл туралы премьер-министрдің орынбасары – ұлттық экономика министрі Серік Жұманғарин мәжілістегі брифингте мәлім етті, -деп хабарлайды «Dalamedia» ақпараттық порталы.

Вице-премьердің айтуынша, қазір Салық кодексіне қатысты түрлі ұсыныстар қаралып жатыр. Әр мәселені зерделеуге нақты мерзім белгіленген. Егер белгіленген 3, 5 немесе 10 күн ішінде жауап беру мүмкін болмаса, ол жүйелі сипаттағы түйткіл ретінде арнайы жұмыс тобының қарауына жіберіледі.

Министрдің сөзінше, мұндай мәселелер жыл сайын жиналатын жұмыс тобының отырысында талқыланады. Соның нәтижесінде кейбір өзгерістер осы жылдың соңына қарай қабылдануы ықтимал. Ал қабылданған түзетулер келесі жылдан бастап күшіне енуі мүмкін. Сонымен қатар, кей тұста Бюджет кодексі мен Салық кодексі арасында сәйкессіздіктер байқалғаны айтылды.Жұманғарин әзірге қоғамды алаңдатпау үшін нақты түзетулерді атаудан бас тартты. Дегенмен қажет болған жағдайда оларды жариялауға дайын екенін жеткізді. Айта кетейік, бұған дейін Президент Қасым-Жомарт Тоқаев Ұлттық құрылтайда жаңа Салық кодексін жетілдіру қажет екенін айтып, құжатқа өзгеріс енгізуге болатынын мәлімдеген. Ал премьер-министр Олжас Бектенов бұл бағытта халық пен бизнес өкілдерінен түскен ұсыныстарды жинап, талдауды тапсырған еді.