Бір жыл бойы сабаққа қатыспаса да, баға алған оқушы анықталды. Шымкенттегі бірқатар колледждерде студенттердің сабаққа қатысуы мен ресми есеп арасындағы айырмашылық байқалған. Бұл туралы өңірлік коммуникациялар алаңында өткен брифингте қала әкімінің орынбасары Сәрсен Құранбек мәлімдеді.

Оның айтуынша, кей колледждерде 2 мың студент оқиды деп көрсетілгенімен, шын мәнінде 300–400 студент қана сабақа қатысады. Мемлекеттік грант иеленіп, бюджет қаржысы бөлінгенімен, сабаққа келмейтін студенттер бар. Кей жағдайларда олардың шәкіртақысын өзге адамдар алып отырғаны да анықталған.

Сондай-ақ қаладағы бір мектепте тіркелген оқушының сол кезеңде шетелде жүргені белгілі болған. Соған қарамастан, ол бір жыл бойы сабаққа қатыспаса да, бағасы қойылып келген. Бұл деректер құзырлы органдарға жолданған.

Білім саласындағы ашықтықты арттыру үшін «Айқын» ақпараттық жүйесі енгізілген. Жасанды интеллектке негізделген платформа мектеп қауіпсіздігін бақылап, өрттің алдын алуға, буллингті анықтауға, тегін тамақтың берілуі мен оқушылардың сабаққа қатысуын қадағалауға мүмкіндік береді.

Білім беру ұйымдарында қаржылық бақылауды күшейту үшін QARQYN бағдарламасы іске қосылған. Жоба мектепке дейінгі, қосымша, жалпы орта және техникалық-кәсіптік білім беру мекемелерін қамтиды. Кадр, қаржы, бухгалтерия және құжат айналымы да цифрлық жүйеге көшірілген.