Қазақстанда жасанды интеллект саласы бойынша мамандар даярлайтын жаңа зерттеу университеті ашылады. Qazaq AI Research University биыл 1 қыркүйектен бастап жұмысын бастайды, — деп хабарлайды «Dalamedia» ақпараттық порталы.

Бұл туралы Үкімет отырысында цифрлық даму, инновациялар және аэроғарыш өнеркәсібі министрі Жаслан Мәдиев мәлімдеді. Оның айтуынша, жаңа оқу орны еліміздегі жасанды интеллект бағыты бойынша білікті кадрлар даярлау ісін дамытуға жол ашады.

Министрдің сөзінше, Қазақстанда жасанды интеллект саласына қажетті мамандарды дайындау жүйесі біртіндеп қалыптасып келеді. Қазір 12–18 жас аралығындағы балаларға арналған креативті технологиялар орталығы TUMO жұмыс істеп тұр. Ал ересектер үшін тәжірибелік бағыттағы AI-мамандарды оқытатын Tomorrow School жобасы іске қосылған.

Жаңа Qazaq AI Research University осы бағыттағы жұмыстың жалғасы болмақ. Университет жасанды интеллект саласындағы білім беру мен ғылыми зерттеулерді дамытуға мүмкіндік береді деп күтілуде.

Айта кетейік, Мемлекет басшысы Қасым-Жомарт Тоқаев бұған дейін де жасанды интеллектіні дамыту мәселесіне бірнеше рет назар аударған. Президент цифрлық жобаларды жүзеге асыру кезінде тиімділік пен қауіпсіздік талаптарын сақтаудың маңызды екенін атап өткен.

Сонымен қатар Қазақстанда жасанды интеллект инфрақұрылымын дамытуға бағытталған ірі бастамалар қолға алынуда. Солардың бірі — Екібастұз қаласында Data Center Valley жасанды интеллект хабын құру жобасы.