Елімізде қытайлық 01.АІ компаниясымен бірлескен кәсіпорын құрылады. Наурыз айына жоспарланған жоба аясында Ұлттық жасанды интеллект платформасына оператор тағайындалмақ. Бұл туралы кеңейтілген үкімет отырысында Цифрлық даму министрі Жаслан Мәдиев мәлімдеді.

Айта кетерлігі, 01.AI компаниясының негізін Google China-ның бұрынғы басшысы Кай-Фу Ли қалаған. Компания өзінің ашық форматтағы Yi-34B жасанды интеллект моделімен танымал. Аталмыш өнім ChatGPT-ге балама саналады.

Министрдің айтуынша, Мемлекет басшысының тапсырмасына сәйкес, жасанды интеллектіні мемлекеттік және квазимемлекеттік секторларда кеңінен қолдану үшін халықаралық тәжірибелі мамандармен бірлесе жұмыс істеу керек. Айта кетерлігі, 01.АІ компаниясымен бірлескен кәсіпорын құруды Президент те құптаған.

Жаслан Мәдиевтің сөзінше, мұндай серіктестік басқару ісіне серпін беретін ЖИ-агенттерді дайындауға мүмкіндік береді. Алайда кейбір сарапшылар бұл бастама жаңа ұлттық, дербес жасанды интеллект моделін жасаудан гөрі, 01.AI компаниясының дайын өнімдерін қолдануға басымдық беруі мүмкін деген пікір білдіруде.