Қазақстанда екінші атом электр станциясы (АЭС) салынатын өңір белгілі болды.
Үкімет шешімі
Үкіметтің 26 қаңтардағы қаулысына сәйкес, елімізде екінші атом электр станциясын салу үшін Алматы облысының Жамбыл ауданы белгіленді. Құжатта аталған аумақ ядролық қондырғы орналастырылатын аудан ретінде айқындалғаны көрсетілген.
Айта кетейік, бұған дейін алғашқы атом электр станциясын салу орны ретінде осы өңірдегі Үлкен ауылының маңы бекітілген болатын.
Референдум нәтижесі
2024 жылдың 6 қазанында Қазақстанда атом электр станциясын салу мәселесі бойынша жалпыхалықтық референдум өтті. Орталық референдум комиссиясының ресми деректеріне сәйкес, дауыс беруге қатысқан азаматтардың 71 пайызы АЭС құрылысына қолдау білдірген. Алайда референдум бюллетеніне станцияны қай елдің компаниясы салатыны жөніндегі сұрақ енгізілмеген.
Қоғамдық пікір және алаңдаушылық
АЭС құрылысына қатысты қоғамдық талқылау барысында бірқатар экологтар мен азаматтық қоғам өкілдері алаңдаушылық танытты. Олар Семей ядролық полигоны мен Чернобыль АЭС-дегі апатты мысалға келтіріп, Балқаш көлінің экологиялық қауіпсіздігіне қатысты мәселелерді көтерді. Сонымен қатар кейбір белсенділер атом электр станциясын ресейлік «Росатом» салған жағдайда, Қазақстанның энергетикалық және саяси тәуелділігі артуы мүмкін екенін айтқан.
Халықаралық консорциум
Кейін Қазақстан үкіметі алғашқы атом электр станциясын салу жөніндегі халықаралық консорциумның жетекшісі ретінде Ресейдің мемлекеттік «Росатом» компаниясы таңдалғанын мәлімдеді. Қазіргі уақытта Алматы облысындағы Үлкен ауылы аумағында топырақ сынамалары алынған.
Ал екінші атом электр станциясының құрылысына байланысты консорциум жетекшісі ретінде Қытай тарапы белгіленген.
DALAMEDIA admin
15
0