Бас прокуратура әлеуметтік желілерде қоғамда алауыздық тудыруы мүмкін арандатушылық сипаттағы жазбалар мен пікірлердің көбейгенін айтып, азаматтарды заң талаптарын сақтауға шақырды. Мұндай әрекеттер үшін қылмыстық және әкімшілік жауапкершілік қарастырылған, — деп хабарлайды «Dalamedia» ақпараттық порталы.

Ведомствоның мәліметінше, соңғы уақытта интернет кеңістігінде қоғамдық келісімге кері әсер ететін, адамдар арасында түсініспеушілік пен жанжал туғызуы мүмкін материалдардың таралу деректері байқалған.

Қазақстан заңнамасына сәйкес, әлеуметтік желілерде құқыққа қайшы ақпарат таратуға жол берілмейді. Егер жарияланған материалдарда қылмыс белгілері болмаса да, заң бұзушылық жасаған тұлғалар әкімшілік жауапкершілікке тартылуы мүмкін.

Мәселен, Әкімшілік құқық бұзушылық туралы кодекстің тиісті нормаларына сәйкес, онлайн платформаларда заңға қайшы контент орналастырғаны үшін 20 айлық есептік көрсеткіш көлемінде айыппұл қарастырылған. Ал жалған ақпарат тарату фактілері анықталған жағдайда, жауапкершілік күшейтіледі.

Бас прокуратура мәліметінше, қоғамда алауыздық қоздыруға бағытталған әрекеттер үшін Қылмыстық кодекстің 174-бабы бойынша жаза белгіленген. Мұндай жағдайда істің ауырлығына қарай ірі көлемдегі айыппұл салу немесе бас бостандығын шектеу, айыру түріндегі шаралар қолданылуы мүмкін.

Сонымен қатар құқық қорғау органы кез келген ақпаратты жарияламас бұрын оның рас-өтірігін тексеруге кеңес берді. Жалған мәліметті таратуға қатысқан адамдар да заң алдында жауап беруі мүмкін.

Бас прокуратура елдегі тұрақтылық пен қауіпсіздіктің негізі — халықтың бірлігі, өзара құрмет және қоғамдық келісім екенін атап өтті.