Қарағандыда әлеуметтік желідегі жазбаларынан кейін ұлтаралық және діни араздық қоздырды деп айыпталған 22 жастағы кәсіпкер Алика Мұхамадиеваға қатысты сот ісі аяқталуға жақын. Бүгін ол соттағы соңғы сөзін айтып, тағы да көпшіліктен кешірім сұрады.
Мұхамадиева өз кінәсін толық мойындап, жасаған ісіне өкініш білдірді. Ол соттан шын жүректен өкінгенін және кішкентай баласы барын ескеруді сұрады.
«Жанымды күйзеген уайымымды, бәрін алдыңғы сот отырыстарында айттым. Бірақ тағы да мен ренжіткен, көңілі қалған барлық адамдардан кешірім сұраймын. Маған өте ұят. Адам кейде бәрін жоғалтқанда ғана өмірдің қадірін түсінеді. Мақсат пен мансап қуып жүріп, қызымды ата-әжесіне қалдырып кететінмін. Енді қасынан бір адым алыстамас үшін барлығын беруге дайынмын», - деді ол көз жасын тыя алмай.
Еске салайық, әлеуметтік желі Threads платформасында Мұхамадиева бірнеше пікір қалдырып, оларда ұлтаралық және діни араздық белгілері бар деп танылған. Қоғамдық резонанстан кейін ол көпшіліктен кешірім сұрағанымен, бұл оны қылмыстық жауапкершіліктен босатпады.
Прокурорлар айыпталушыға 4,5 жыл бас бостандығынан айыру жазасын сұраған.
Сот үкімі бүгін сағат 17:00-де жарияланады.
DALAMEDIA admin
6
0