Қазақстанда қоғамдық орындарда бет-жүзді толық жабатын киім киген 1179 азамат әкімшілік жауапкершілікке тартылды, -деп хабарлайды «Dalamedia» ақпараттық порталы.

Бұл туралы Ішкі істер министрлігі мәлімдеді. Ведомство өкілдерінің айтуынша, адамның түр-сипатын тануға кедергі келтіретін киімдерді қоғамдық орындарда киюге заңмен шектеу қойылған. Аталған талап «Құқық бұзушылық профилактикасы туралы» заңның 75-бабы 3-тармағында көрсетілген.

Заңға сәйкес, бетті толық жауып тұратын киім кию құқық бұзушылық болып саналады. Дегенмен, бұл талап ауа райына байланысты қорғаныш киімдеріне, медициналық қажеттілікке, қызметтік міндетті орындауға, спорттық және мәдени шараларға қатысу жағдайларына қолданылмайды.

ІІМ мәліметінше, мұндай әрекет үшін Әкімшілік құқық бұзушылық туралы кодекстің 434-3-бабы бойынша жауапкершілік қарастырылған. Алғаш рет ереже бұзған азаматтарға ескерту беріледі. Егер бір жыл ішінде заң талаптары қайта бұзылса, 10 айлық есептік көрсеткіш көлемінде айыппұл салынады.

Қазіргі таңда осы норма бойынша 1179 адам әкімшілік жауапкершілікке тартылған.

Министрлік бұл талап қоғамдық қауіпсіздікті сақтау мақсатында енгізілгенін атап өтіп, азаматтарды заң талаптарын сақтауға шақырды.