Алматыда отбасылы ер адамды аңдыды деген күдікпен әйелге қатысты қылмыстық іс қозғалды. Қазіргі уақытта аталған дерек бойынша тергеу жүріп жатыр, — деп хабарлайды «Dalamedia» ақпараттық порталы.

Бұл туралы Алматы полициясы қоғамдық қауіпсіздік департаменті бастығының орынбасары Айтан Елеусізов мәлімдеді. Оның айтуынша, мұндай сипаттағы жағдайлар, соның ішінде сталкинг фактілері де тіркеліп отыр.

«Әйел қайта қосылуды қалаған, алайда ер адам отбасылы болғандықтан және некесін бұзғысы келмегендіктен полицияға жүгінген», – деді ол.

Ресми мәліметке сәйкес, сталкинг жағдайлары сотқа дейінгі тергеу кезеңінде жиі тоқтайды. Себебі құқық қорғау органдары алғашқы ескертуден кейін тараптарға заң талаптарын түсіндіреді. Ал аңду жалғасқан жағдайда бұл сотта ауырлататын мән-жай ретінде қаралуы мүмкін.

Мамандардың айтуынша, сталкинг көбіне үздіксіз қоңыраулар, қорқыту, бақылау, қозғалысты аңду және психологиялық қысым түрінде көрінеді. Кей жағдайларда қысым үшінші тұлғалар арқылы да жасалуы мүмкін. Полиция мұндай әрекеттердің алдын алуға ерекше назар аударып отыр.

2026 жылдың сәуір айындағы дерек бойынша, 3104 адам профилактикалық бақылауға алынған. Оның ішінде 2557 құқық бұзушыға қорғау нұсқамалары берілсе, 547 адамға арнайы мінез-құлық талаптары қойылған. Бұл талаптарды бұзған 127 және 145 адамға қатысты жауапкершілік шаралары қолданылған.

Сонымен қатар тұрмыстық зорлық-зомбылық фактілері бойынша 2173 адам әкімшілік жауапқа тартылған. Жыл басынан бері полицияға мұндай сипаттағы 4952 хабарлама түскен.

Жәбірленушілерді қорғау мақсатында агрессорларға қатысты шектеу және оқшаулау шаралары қолданылып жатыр. 17 адам уақытша ұстау изоляторына, ал 347 құқық бұзушы арнайы қабылдау орындарына қамалған.

Бұдан бөлек, 30 арнайы мінез-құлық талабы енгізіліп, 6 тыйым салу бұйрығы шығарылған. Жыл басынан бері дағдарыс орталықтарына 24 әйел мен 49 кәмелетке толмаған бала орналастырылған. Алматыда зорлық-зомбылық құрбандарына көмек көрсететін 16 мемлекеттік орталық жұмыс істейді.