Астанада жасөспірімдер арасындағы құқық бұзушылықтың алдын алу және олардың қауіпсіздігін қамтамасыз ету мақсатында Есіл ауданында «Түнгі қаладағы балалар» жедел-профилактикалық іс-шаралары өткізілуде, деп хабарлайды «Dalamedia» ақпараттық порталы.

Рейдтер «Заң мен тәртіп» жобасы аясында ұйымдастырылып, оған қалалық Білім басқармасы, Төтенше жағдайлар департаменті, Кәмелетке толмағандардың істері және олардың құқықтарын қорғау жөніндегі комиссия мүшелері, Полиция департаменті, Балалардың құқықтарын қорғау басқармасы мен Қалалық психологиялық қолдау орталығының мамандары қатысты.

Іс-шара барысында мектеп бітіру кештері өтетін орындар мен жастар жиі жиналатын қоғамдық аумақтар бақылауға алынды. Мамандар жасөспірімдерге қоғамдық тәртіпті сақтау мен қауіпсіздік талаптарын түсіндіріп, профилактикалық жұмыстар жүргізді.

Судағы қайғылы жағдайлардың алдын алу үшін Есіл өзенінде де арнайы рейдтер ұйымдастырылды. Құтқарушылар катерлер мен құтқару кеудешелерін пайдаланып, су айдындарындағы қауіпсіздік талаптарының сақталуын қадағалады.

Сондай-ақ кәмелетке толмағандар мен олардың ата-аналарына түсіндіру жұмыстары жүргізілді. Қауіпті аумақтарда, соның ішінде түнгі уақытта бақылау бекеттері қойылып, жаяу патрульдеу ұйымдастырылды.

Мұндай шаралар жастардың қауіпсіздігін күшейтіп, төтенше жағдайлардың алдын алуға бағытталған.